मुस्लिम समुदायको पवित्र महिना रमजानको पावन अवसरमा साउदी अरब सरकारले त्यहाँका विभिन्न जेलमा सजाय काटिरहेका ३३ जना नेपाली कैदीहरूलाई आममाफी दिने निर्णय गरेको छ ।
रियादस्थित नेपाली दूतावासमार्फत नेपाल सरकारले गरेको विशेष अनुरोधका आधारमा साउदी सरकारले यो मानवीय र उदार निर्णय लिएको हो । परराष्ट्र मन्त्रालयले एक विज्ञप्ति जारी गर्दै साउदी अधिराज्यको यस कदमप्रति हार्दिक धन्यवाद तथा कृतज्ञता ज्ञापन गरेको छ भने यस निर्णयले नेपाल र साउदी अरबबिच लामो समयदेखि कायम रहेको मैत्रीपूर्ण सम्बन्ध, सद्भाव र प्रगाढ द्विपक्षीय सम्बन्धलाई थप उजागर गरेको उल्लेख गरेको छ ।
आममाफी पाएका ३३ जना नेपाली नागरिकहरू साउदी अरबको स्थानीय कानुनी प्रक्रिया पूरा हुनासाथ छिट्टै स्वदेश फर्कने तयारीमा रहेको मन्त्रालयले जनाएको छ ।
